Mijëra persona në Francë, morën pjesë protestat e organizuara nga sindikatat kundër shkurtimeve të vendeve të punës për shkak të pandemisë COVID-19.
Këto protesta vijnë pasi kompania e gomave Bridgestone, tha se do të mbyllte një fabrikë në Francën veriore, një vendim që vë në rrezik më shumë se 800 vende pune.
Ka pasur mijëra shkurtime të vendeve të punës në shumë kompani franceze duke përfshirë Airbus, Renault dhe Sanofi për shkak të pasojave ekonomike nga pandemia e COVID-19, shkruan Euronews.
Auchan, një zinxhir supermarketesh, kohët e fundit njoftoi se do të shkurtonte pothuajse 1500 vende pune pavarësisht se ishin të hapura edhe në periudhën e karantinës.
Instituti kombëtar i statistikave i Francës ka thënë se niveli i papunësisë ka të ngjarë të rritet në 9.5% deri në fund të vitit 2020.
Sindikatat franceze, përfshirë Konfederatën e Përgjithshme të Punës (CGT), kanë bërë thirrje për protesta, duke deklaruar se politikat qeveritare ndihmojnë kryesisht kompanitë dhe nuk mbrojnë siç duhet punëtorët.
Sindikatat kanë kritikuar gjithashtu planet për të reformuar pensionet dhe papunësinë.
