Jugu i Francës është nën flakë dhe kjo ka detyruar mbi 10 000 njerëz që të braktisin shtëpitë e tyre gjatë natës. Qindra zjarrfikës po përballen me vatrat e zjarrin në zonën e Bormes-les-Mimoses, në provincën e Provence-Alpes-Cote d’Azur.
Franca kishte kërkuar ndihmën e fqinjëve të saj të BE për të luftuar flakët. Më shumë se 4000 hektarë tokë janë shkrumbuar përgjatë bregdetit të Mesdheut dhe në ishullin e Korsikës. Zyrtarë lokalë thanë se evakuimi i mijëra njerëzve u bë i detyrueshëm pas përparimit të shpejtë të zjarreve. Dëmi në turizëm është mjaft i madh, pasi popullsia e zonave të evakuuara zakonisht dyfishohet ose trefishohet gjatë verës për shkak të pushimeve. Një prej vatrave më të rrezikshme të zjarrit gjendet fare pranë Saint-Tropez, një nga zonat më ikonike të rivierës franceze.
Prej ditësh, më shumë se 4 000 zjarrfikës dhe ushtarë, avionë që hedhin ujë, po luftojnë për të fikur flakët. Raportohet se mbi 30 zjarrfikës dhe policë janë plagosur gjatë punës, por fatmirësisht nuk ka pasur asnjë viktimë deri tani.
