Kryeministri Edi Rama, ka folur rreth akuzave që opozita ka ngritur rreth tij, në lidhje me foton e tij me ish-presidentin e SHBA-ve, Barack Obama.
I ftuar në emisionin “Real Story” në News24, Rama tha se kjo është një çështje e hetuar dhe e gjykuar në SHBA dhe po të kishte lidhje, nuk do ishte i papërfshirë nga ana e drejtësisë amerikane.
Kreu i Qeverisë e komenton gjithë këtë situatë si një lojë politike, duke kujtuar akuzat për PD-në dhe lobimin rus.
“Kjo është një çështje e hetuar dhe e gjykuar në SHBA dhe unë po të kisha lidhje me këtë çështje nuk do isha një person tërësisht i papërfshirë, i pa pyetur dhe i pakonsideruar gjëkundi nga ana e drejtësisë amerikane. Kjo vjen si përpjekje për rikompensuar në sytë e publikut një çështje tjetër të hapur, shkelje flagrante e ligjeve shqiptare dhe me përfshirje të aktorëve të tretë përmes financimit të PD. Është thjesht një lojë politike dhe nuk më intereson. Unë nuk kam marrë pjesë në asnjë eveniment, kam bërë një foto me presidentin e SHBA-ve dhe kaq”, u shpreh kryeministri Rama.
