Një servis makinash është përfshirë nga flakët një natë më parë. Ngjarja ka ndodhur në Elbasan . Biznesi ishte në pronësi të një personi te arrestuar vetëm pak ditë më parë nga policia. Ai është kapur për llogari të shtetit italian, dhe pritet të ekstradohet. Bëhet fjalë për Elton (Kastriot) Kila, banues në lagjen “Qemal Stafa”. Ky i fundit është arrestuar vetëm 5 ditë më parë nga policia.
Ky u ndal në bazë të një urdhër-arresti lëshuar nga autoritet italiane para 1 muaji. Policia e Elbasanit ka arrestuar të enjten në mëngjes 37-vjeçarin e shpallur në kërkim nga Prokuroria e Pescara-s në Itali. Policia sqaron se ai u ndalua, në sajë të kontrolleve për personat e shpallur në kërkim.
“Në vijim të zbatimit të planit të masave për Kontrollin e territorit, parandalimin e ngjarjeve kriminale dhe kapjen e autorëve të ndryshëm të veprave penale, Policia e Elbasanit ka bërë të mundur kapjen e një shtetasi të shpallur në kërkim ndërkombëtar. Konkretisht u ndalua Elton (Kastriot) Kila , 37 vjeç, banues në lagjen ‘Qemal Stafa’ Elbasan”, thuhej në njoftim.
Në Itali, sipas të njëjtave burime, 37-vjeçari akuzohet se ka qenë pjesë e një organizate kriminale, me aktivitet në fushën e narkotikëve.
“Ndalimi i tij u bë me qëllim ekstradimi për në Itali, pasi Prokuroria e Pescara-s/Itali, ka lëshuar urdhrin e ndalimit ndërkombëtar Nr.SPIE522/2011, datë 11.09.2018, për kryerjen e veprave penale ‘Organizata kriminale’, ‘Trafikim i narkotikëve’, ‘Mashtrim’ dhe Kallëzim i rremë’, parashikuar nga nenet 110,416,367, e 642 të Kodit Penal Italian, si dhe neni 73 i Ligjit kundër Drogave. Materialet u referuan në Prokurorinë pranë Gjykatës së Shkallës Parë Elbasan, për veprimet të mëtejshme”.
Në postimet që 37-vjeçari bën në rrejtët sociale, shfaq jetën e luksit. Makina të shtrenjta të markave “Ferrari”, “Lamborghini”, pushime ekzotike dhe jo vetëm…/TIRANA TODAY/
