Një erë e fuqishme ka kapluar gjatë ditës së sotme qytetin bregdetar të Vlorës duke shkaktuar dëme të konsiderueshme materiale.
Bëhet e ditur se si pasojë e erës së rëmbyer, janë thyer bimë të shumta përreth qytetit si dhe janë shënuar dëme në bujqësi e në veçanti në të mbjellat e hershme kopshtare.
Një ngjarje tjetër e pazakontë ka ndodhur në shëtitoren kryesore në qytetin e Vlorës, ku si pasoje e këtyre erërave nga tarraca e një pallati ka rënë një depozitë uji.
Fatmirësisht nuk ka pasur viktima por kjo ngjarje ka rritur frikën e shënimit të rasteve të tjera të ngjashme.
Kujtojmë, se si rrjedhojë e mos zbatimit të ligjit gjatë këtyre viteve, në fasadat e pallateve por edhe në soleta e tyre, ka pasur mbidyndje me depozita uji dhe transmetues satelitor, që në raste të ngjashme mund të jenë vërtet problem serioz dhe kërcënim për jetën e njerëzve.
