Vdekja e 23-vjeçares Evgjeni Baxho, është kthyer në një mister që ende nuk po zgjidhet, teksa simbolet që u gjetën të vizatuara në trupin e saj, tashmë po qarkullojnë edhe në rrugët e Tiranës.
Ky simbol, është pikturuar në një mur pranë gjimnazit ”Ismail Qemali”, shkruan Top Channel. He’s coming, që në shqip do të thotë ai po vjen, është përshkrimi i bërë krahas simbolit, por nukdihet se kujt i drejtohet dhe se me çfarë ka të bëjë.
Ngjarja e rëndë u bë publike me datë 18 maj, dhe fillimisht u tha se Evgjeni Baxho kishte ndërruar jetë si pasojë e një infeksioni në dhëmballë. Por, në dokumentin e Policisë Gjyqësore janë zbardhur detaje të frikshme, ku thuheje se në trupin e saj, kishte një shkrim të panjohur, i bërë me lapostil me ngjyrë të kuqe nga kërthiza deri në pjesën e ezofagut
“Gjatë këqyrjes së vendit të ngjarjes është vënë re në trupin e kufomës, në pjesën e barkut një shkrim i panjohur, i bërë me lapostil me ngjyrë të kuqe nga kërthiza deri në pjesën e ezofagut. Po ashtu gjatë autopsisë në pjesën e shpinës së kufomës janë vërë re tre shkrime të tjera të panjohura, të bëra po ashtu me lapostil të kuq”, thuhej në dokument.
Ndërkohë, personi i fundit që e ka takuar Baxhon, është një i ri i cili kishte miqësi me të. Viktima punonte në një kompani telefonike, dhe i riu i cili ishte kolegu i saj i punës, ishte takuar me të në një kafene, dhe e kishte pyetur se përse nuk ishte paraqitur në punë prej 10 ditësh.
Në dëshminë e tij, ai ka deklaruar se Baxho është çuar nga kafeneja, pas një telefonate, e cila rezultoi të ishte nga tezja e saj.
