Ujërat e lumit Osum, që rrjedhin mes për mes qytetit të Beratit, janë ndotur sërish. Për disa orë me radhë uji i lumit vazhdon të rrjedhë në qytet me ngjyrë të zezë dhe totalisht i ndotur.
Në ujërat e lumit shihet edhe një dele e ngordhur, ndërsa nuk dihen rrethanat se si ka përfunduar aty.
Shumë banorë beratas shprehen se ndotja mund të ketë shkaktuar nga fabrikat e ullirit, të cilat gjatë procesit të përpunimit të ullirit për ta bërë vaj, mbetjet ose siç quhet ndryshe “bërzitë” e ullirit i hedhin në lumë.
Situata ka krijuar shqetësim mes banorëve, por ende asnjë reagim nga Bashkia dhe institucionet e tjera lokale që kanë për detyrë të monitorojnë respektimin e ligjit.
Ndotja e lumit Osum ka qenë një problematikë e vazhdueshme që duket se nuk ka marrë zgjidhje.
