Mediat italiane kanë publikuar të tjera detaje lidhur me operacion e një dite më parë të ndërmarrë nga policia ku u godit një bandë prostitucioni e cila udhëhiqej nga shqiptarë. Sipas tyre në pranga kanë rënë “zotërinjtë” e bandës mafioze, shkruan Tirana Today. 
Ata kishin krijuar një monopol në zonat ku operonte biznesi i tyre dhe me anë të kërcënimeve kishin arritur të vendosnin sundimin e tyre mbi pothuajse të gjithë rrethin e qytetit. Ndërsa, me anë të njëjtës metodë, ata kishin qenë në gjendje të vendosnin çmimin se sa do të paguhej një prostitutë e cila ishte nën sundimin e tyre, raporton milanotoday.it.
Ekipi Mobile në Milano, i drejtuar nga Lorenzo Bucossi, ka arrestuar të martën 25 shqiptarë, të akuzuar si anëtarë të një bande që merrej me drogë dhe prostitucion. Të gjithë të arrestuarit janë nga Fieri, të cilët kishin arritur që të bëheshin “pronarët” e prostitutave, të cilët i gjenin vete gratë dhe klientët e tyre. Hetimi, ka filluar në vitin 2015, pas ankesave të vazhdueshme nga banorët lidhur me bandën shqiptare.
Dhjetë mijë euro në muaj nga çdo vajzë
Gjatë viteve, në fakt, ka theksuar Bucossi, “askush nuk ka pasur guximin për të dalë kundër 25 anëtarëve”, kështu që grupi gjithnjë e më shumë dominonte dhe kishte nën sundimin e tij 35-vajza.
Udhëheqësit ishin tre shqiptarë të njohur me nofkat, “xhaxhai” Kristian Marku, Renato Arapi i njohur si “Kaci” i njohur dhe Oridian Faslliaj i njohur si “Ori”.
Rreth 30 vajza shfrytëzoheshin për prostitucion nga ky grup, të cilat janë kryesisht shqiptare, rumune dhe moldave të moshës nga 20 deri në 25 vjeç. Ato ishin dërguar në Itali me premtimin se do të punësoheshin dhe pasi kishin mbërritur aty, ishin nxjerrë në rrugë. Hetuesit italianë thonë se një vajzë paguhej 500 Euro për një natë, dhe fitimet në muaj shkonin rreth 1o mijë Euro.
Kjo organizatë kriminale qarkullonte më shumë se 40 mijë Euro në muaj, duke shfrytëzuar vajzat për prostitucion. Hetimi i policisë italiane nisi pas denoncimit të një prej vajzave të shfrytëzuar, duke çuar kështu në arrestimin e 25 shqiptarëve.
Klanin gjithashtu e bashkonte lidhja e gjakut, dhe krijuan monopolin e tyre ku me anë të hakmarrjes dhunës dhe kërcënimeve mbanin nën sundim vajzat. Ndërsa, për këdo që i kundërshtonin qoftë një klient apo vajza ata i priste kërcënimi me pistoletë e kalibrit 7.65 me Browning, e cila u gjet në shtëpinë e njërit prej të arrestuarve. TIRANA TODAY
