Për shkak të reshjeve të shumta të dëborës, dje ka pasur probleme në qarkun e Elbasanit dhe atë të Korçës. Por, sot situata paraqitet ndryshe.
Gjatë mbrëmjes së të dielës në pikën doganore të Kapshticës, pala greke ndaloi kalimin e kamionëve dhe autobusëve. Ndërsa mjetet e vogla u lejuan të qarkullojnë vetëm duke përdorur zinxhirë.
Autoriteti Rrugor Shqiptar njoftoi se ka vënë në dispozicion një sërë borëpastruesesh në akset kryesore të cilat kanë qenë të kalueshme.
Probleme gjatë fundjavës ka pasur edhe në qarkun e Elbasanit. Trashësia e borës ka arritur deri 30 centimetra. Reshje bore janë shënuar edhe në verilindje, por problemet kanë qenë më të pakta.
Ja situata nëpër akset më problematike paraditen e sotme
Segmenti rrugor Qafë Thanë-Pogradec dhe Pogradec-Qafë Plloçë, si edhe Qafë Plloçë-Korçë është i hapur për kalimin e mjeteve.
Segmentin rrugor Fushë Arrës – Qafë Mali – Kukës ka pasur reshje bore gjatë natës dhe kjo zonë është kaluar me borëpastruese duke hedhur dhe kripë.
Segmenti rrugor Pukë-Fushë Arrës-Kukës ka reshje sporadike bore (të dobëta) Mjetet e pastrimit të dëborës janë në punë dhe një pjesë në gatishmëri.
Segmenti rrugor Korçë–Dardhë dhe Korçë–Voskopojë ka pasur reshje bore gjatë gjithë natës. Kontraktori ka bërë pastrimin në këtë aks deri në orët e vona të natës, për pastrimin e plotë dhe shpërndarjen me kripë.
Në Qafën e Qarrit dhe në Kapshticë ka pasur reshje bore që janë pastruar.
Në akset e tjera rrugore nuk ka probleme.
“Autoriteti Rrugor Shqiptar dhe Policia Rrugore i bëjnë thirrje përdoruesve të mjeteve rrugore që të respektohen rregullat e qarkullimit rrugor, sinjalistika dhe të kenë shumë kujdes në orët e para të mëngjesit dhe gjatë natës”- thuhet ne njoftimin e ARRSH.
