Protestuesit serbë në Bërnjak, edhe sot kanë vijuar qëndrimin e tyre në tenda, në pikën kufitare. Mediat në Kosovë kanë publikuar fotografi nga vendi-qëndrimi i tyre, të cilët nesër pritet të largohen, sipas marrëveshjes së fundit mes Kosovës dhe Serbisë.
Sot, në ditën e dymbëdhjetë të bllokadës, situata është e qetë në të dy pikat kufitare në Jarinjë dhe Bërnjak, që lidhin Kosovën dhe Serbinë.
Këto pika vazhdojnë të jenë të bllokuara nga dhjetëra qytetarë serbë, që janë duke protestuar që nga data 20 shtator, kur Qeveria e Kosovës vendosi masën e reciprocitetit për targat me Serbinë.
Bashkë me qytetarët, afër këtyre pikave në veri të vendit po qëndrojnë edhe njësitë speciale të Policisë së Kosovës.
Fundi i kësaj bllokade do jetë dita e shtunë, pasi Kosova dhe Serbia kanë arritur dakordësinë në Bruksel, për shtensionimin e situatës në veri të Kosovës.
