Agim Çerma, i arrestuar në Kolumbi si baron droge, rezulton të jetë i dënuar në vendin tonë me burgim të përjetshëm për vrasje. Ai u prangos dy ditë më parë së bashku me 4 bashkëpunëtorët e tij, pas një operacioni të agjencisë amerikane, DEA, ndërsa do të ekstradohet në SHBA.
Agim Çerma rezultoi të ishte koka e grupit të trafikut të drogës nga Kolumbia drejt SHBA-së, ndërsa ishte i lidhur edhe me “Klanin e Golfit” dhe grupe të tjera kriminale për të blerë dhe transportuar kokainën.
Çerma i cili njihej me pseudonimin “Jimmy”, arrinte të kalonte lëndën narkotike duke u paraqitur si tregtar i produkteve kozmetike rrugëve të Barranquilla, qytet në Kolumbi. Ai dërgoi mijëra kilogram kokainë në Europë e SHBA, duke përdorur edhe me fluturimet charter nga Aeroporti Ndërkombëtar i Palmirës, dhe ishte një nga kriminelët më të kërkuar në botë.
Si fitoi lirim me kusht nga Gjykata e Lezhës?
Trafikanti i rrezikshëm rezulton të jetë i dënuar në vendin tonë me burgim të përjetshëm për vrasje. Ai këtë dënim e ka marrë nga Gjykata e Elbasanit në vitin 1998, për vrasjen e Gezim Liçit dhe plagosjen e efektivëve të policisë si dhe dëmtimin e makinave të tyre. Ngjarja e rëndë ka ndodhur në ’97-ën, po në Elbasan. Në atë kohë u arrestua dhe vëllai i Agimit, Gazmend Çerma, i cili u dënua me 11 vite burg. Ky i fundit e ankimoi këtë vendim në Apelin e Durrësit, kërkesë qe iu refuzua.
Në ankimimin e bërë prej tij, Gazmend Çerma ia kalon përgjegjësinë të vëllait, Agimit, duke argumentuar se nuk kishte dijeni se i vëllai i tij kishte armë me vete dhe se do të kryente vrasjen. Bashkë me dy vëllezërit u arrestuan edhe disa persona të tjerë. Ndonëse i dënuar përjetë, Agim Çerma ka fituar lirim me kusht nga Gjykata e Lezhës. Pasi la qelinë e burgut, Agim Çerma mendohet se është larguar drejt vendeve te Europës, dhe më pas në vendet e Amerikës Latine ku është përfshirë në trafikun ndërkombëtar të drogës.
Pas një kalvari të gjatë nëpër gjykata, ai u lirua me kusht në vitin 2012 nga Gjykata e Lezhës për motive të paqarta, ndërsa lirimi i tij mban firmën e gjyqtares Parashqevi Ademi, e dënuar për “korrupsion”.
Por si u arrestua gjyqtarja?
Ish-gjyqtarja Parashqevi Ademi u arrestua në vitin 2015, dhe u dënua me 4 vite burg për korrupsion, pasi u filmua duke i marrë 200 mijë lekë një qytetari në këmbim të një vendimi. Gjyqtarja e Lezhës u arrestua në flagrancë në sallën e gjyqit në Gjykatën e Lezhës. Ajo u lirua në korrik të 2016, pasi përfundoi dënimin, duke përfituar ulje./Tirana Today
