Shtyhet sërish seanca për çështjen Shullazi. Vendimi u mor paraditen e sotme, pasi avokatët kërkuan kohë për të përgatitur konkluzionet.
Kjo kërkesë u pranua nga trupi gjykues, ndërsa mbrojtja e grupit “Shullazi” do të paraqesë konkluzionet në Gjykatën për Krime të Rënda më 23 tetor.
Seanca u shoqërua me masa të rrepta sigurie, siç edhe duket nga fotot.
Pretenca
Prokuroria e Krimeve të Rënda dha më dy tetor pretencën për Emiljano Shullazin dhe katër persona të tjerë, të akuzuar për gjobëvënie.
Prokuroria kërkoi 64 vjet burg në total për grupin me pesë anëtarë të Emiljano Shullazit. Në këtë seancë, Prokuroria e Krimeve të Rënda përfaqësohej nga prokurorët Gentian Osmani, zv/ drejtues, Anton Martini dhe Besnik Muçi.
Drejtuesja e Prokurorisë së Krimeve të Rënda, Donika Prela, mungoi në seancë për shkak të një angazhimi jashtë vendit, raporton Panorama.
Prokuroria e Krimeve të Rënda kërkoi 17 vjet burgim për Emiljano Shullazin, 15 vjet burgim për Gilmando Danin, nga 11 vjet burgim për Endri Zelën dhe Endrit Qyqen dhe 10 vjet burgim për Blerim Shullazin.
Vetë të pandehurit nuk ishin në seancë, por kishin kërkuar që të përfaqësoheshin vetëm nga avokatët e tyre.
Seanca zgjati plot tri orë, ndërsa nuk munguan edhe përfaqësues nga Ambasada Amerikane dhe Gjermane në sallën e gjyqit. Sipas Prokurorisë, Emiljano Shullazi, Gilmando Dani, Endrit Qyqja, Endri Zela dhe Blerim Shullazi kanë kryer të paktën katër episode të kanosjes dhe gjobëvënies.
E para është renditur ajo ndaj biznesmenit Ylvi Beqja, që është edhe dëshmitar i mbrojtur i drejtësisë. Më pas, rasti i Jani Zakjes, për shpërthimin në një garazh në ish-“Parkun e Autobusëve” në Tiranë; kërcënimin e Mynyr Konit dhe Dhori Kules, si edhe tritolin e vendosur në një firmë profilesh alumini në Lushnje.
