Presidenti i FIA-s i ka befasuar të gjithë, duke mos e kurorëzuar si më të mirin ish-pilotin e tij në kohën e Ferrarit. Zhan Tod ka vënë në dukje se nuk mjaftojnë titujt, për të përcaktuar se cili ka qenë piloti më i madh i të gjitha kohërave.
Francezi ka një tjetër ide në lidhje me pilotin më të mirë të historisë. Në një intervistë për “Canal+”, numri një i FIA-s ka shpjeguar këndvështrimin e tij për këtë çështje.
“Nuk e kam konsideruar asnjëherë Shumakerin, si pilotin më të mirë të historisë, sepse kjo është diçka shumë e vështirë për t’u përcaktuar. Mendoj që ka kampionë të jashtëzakonshëm në epoka të ndryshme. Për shembull Fanxho ishte më i miri i kohës së tij, ashtu sikurse Xhim Klark.
Sot mund të themi që Luis Hamilton është numri një i kësaj periudhe. Shpesh kemi parë që për 10 vite një pilot të dominojë”, shprehet Tod, sipas të cilit nuk ka shumë rëndësi as numri i titujve të fituar në këtë çështje.
“Mund t’i llogarisim kampionatet e fituara, por ky nuk është një tregues. Për shembull në epokën e Fanxhos kishte më pak gara, mund të përdorej makina e shokut të skuadrës dhe sistemi i pikëve ishte i ndryshëm. Kështu që, nuk mund të bëjmë një ballafaqim të vërtetë mes pilotëve”.
