Formacionet zyrtare/Mbappe merr në dorë “çelësat” e Parisit

PSG do të presë në “Parc des Princes” gjigantin e Real Madrid në misionin e vështirë por jo të pamundur, të përmbysjes së rezultatit të ndeshjes së parë. Parisienët u mposhtën me rezultatin 3-1 në “Santiago Bernabeu”, por përtej rezultatit në këtë sfidë do të kenë edhe një mungesë mjaft të rëndësishme, atë të Neymar.

Trajneri Unai Emery ka zgjedhur si zëvendësues të yllit brazilian, argjentinasin Anhel Di Maria. Ky i fundit momentalisht gëzon një formë mjaft të mirë fizike dhe sa herë ka prekur fushën ka shënuar dhe asistuar. Por ka edhe një faktor tjetër që të bën të besosh se Di Maria do të bëjë një paraqitje të mirë, pasi ai ka qenë pjesë e madrilenëve dhe një pjesë të mirë të tyre e njeh. Pesha e madhe në këtë sfidë do të bjer mbi shpatullat e blerjes së dytë më të shtrenjtë, Kylian Mbappe.

Nga ana tjetër Zidane me një Ronaldo të relaksuar dhe me rezultatin e favorshëm ndjehet edhe më i qetë. Pavarësisht se ka zgjedhur të mos i hedhë në fushë nga fillimi dy motorët e mesfushës, Modric dhe Kroos, të cilët sapo janë rikthyer nga një dëmtim. Ata do ti zëvendësojnë dy “çelësat”, që sollën ndryshimin në ndeshjen e parë Assensio dhe Lucas Vasquez. Po ashtu një lajm i mirë është rikthimi në fushë i Carvajal.