Policë dhe ushtarë të armatosur rëndë kanë pushtuar kuvendin në El Salvador, teksa presidenti i vendit kishte planifikuar të mbante një fjalim. Ata kanë kërkuar miratimin e një huaje prej 109 milionë dollarë për blerjen e pajisjeve më të mira për ushtrinë dhe policinë.
Opozita e ka quajtur një akt kërcënues dhe frikësimi praninë e forcave ushtarake në Kuvend, shkruan BBC. Presidenti më herët u ka dhënë një afat prej 7 ditësh opozitës që t’i bashkohet nismës për miratimin e huasë.
Me huan që ai ka kërkuar të miratohet, synohet blerja e automjeteve, uniformave, pajisjeve për mbikëqyrje dhe një helikopter.
El Salvadori është njëri prej shteteve me shkallën më të lartë të vrasjeve në botë. Shumica e vrasjeve kryhen nga grupet kriminale që veprojnë në mbarë territorin e Amerikës Qendrore.
