Kroacia ka shkruar historinë dhe më 15 korrik do të luaj në finalen e Botërorit të Rusisë përballë Francës. Në rast se kroatët do të triumfojnë në këtë Kupë Bote do të jenë i pari vend nga Ballkani që e bën diçka të tillë.
Në skuadrën e Kroacisë së viti 1998, e cila arriti deri në gjysmëfinale ka qenë pjesë edhe Ardian Kozniku, shqiptari i parë që ka luajtur në një Botëror. Ai ka dhënë një intervistë për finalen mes Kroacisë dhe Francës ku shprehet mjaft i lumtur dhe optimist që këta lojtarë mund të shkojnë më lart dhe mund të ngrenë trofeun.
“Në tërë Kroacinë ka mbretëruar dhe po mbretëron festë e madhe, pas triumfit ndaj Anglisë në gjysmëfinale të Kupës së Botës në Rusi. Kjo fitore është festuar në të gjitha qytetet kroate, kanë festuar i madh e i vogël. Kjo gjeneratë nuk na e kalojë vetëm neve që fituam vendin e tretë në Botërorin e Francës në vitin 1998, por edhe gjithë botës”, tha Kozniku në një intervistë për gazetën “Lajm”.
“Një shtet me vetëm 4 milion banorë të luaj në finale, kjo është diçka fantastike. Ende nuk na besohet se jemi në finale të Botërorit. E tash kemi një tjetër ëndërr, ta fitojmë trofeun e Kupës së Botës. Më vjen mirë që kësaj feste i janë bashkuar jo vetëm shqiptarët që jetojnë në Kroaci, por edhe në Kosovë dhe Maqedoni.
Finalja shpresoj të prodhojë një lojë të mirë, sepse aty kanë mbërritur skuadrat më të mira dhe me plotë meritë. Franca ka lojtarë fantastik, por mos harroni se edhe Kroacia ka lojtarë fantastikë. Të dyja kombëtaret kanë top emra. Mendoj se shanset janë 50-50, por normalisht kam dëshirë të fitojë Kroacia.
E lus Zotin, që këta lojtarë t’i hakmerren Francës për atë humbje në vitin 1998. Ndeshja mund të zgjasë edhe 120 minuta, nuk i dihet, sepse është finale e Botërorit. Por, shpresoj se me lojë të mirë dhe me pak fat, mund ta fitojmë Kupën e Botës”, ka përfunduar Ardian Kozniku.
Ardian Kozniku ishte njëri prej futbollistëve më të njohur shqiptarë në vitet e 90. Ish-futbollisti gjakovar ishte i pamëshirshëm përpara portës, duke mos i falur rastet që i vinin.
Sulmuesi i dikurshëm shtatlartë, kishte shënuar thuajse në të gjitha klubet ku kishte luajtur, por golin e ka shijuar edhe me kombëtaren e Kroacisë, me të cilin e kishte fituar medaljen e bronztë në Botëror.
Kozniku gjatë karrierës ka luajtur me ekipet, Vëllaznimi, Prishtina, Hajduk Split, Cannes, Le Havre, APOEL, Bastia, Dinamo Zagreb, Karnten e Hrvatski Dragovoljac.
