Mjafton një episod dhe në botën e futbollit do të mbahesh mend përgjithmonë. Një ndeshje mjaftoi që arbitri Tom Hening Ovrebo të mbahej mend për keq. Ai ishte protagonist teksa gjykonte një nga ndeshjet më kontroverse të të gjitha kohërave në Champions League, në mes Chelsea dhe Barcelonës, në gjysmëfinalen e vitit 2009.
Barcelona u kualifikua ndeshjen e dytë gjysmëfinale falë golave në fushë kundërshtare, pas një realizimi në minutat e fundit nga Andres Iniesta, por ndeshja do të mbahet mend për gjykimin e norvegjezit Ovrebo.
Duke folur për revistën “Panenka” 10 vite më pas, ai tregon se i duhej një eskortë policie për t’u larguar nga Anglia pas atij episodi, ku nuk akordoi një penallti ndaj Maluda, teksa faullin e akordoi jashtë zone, dhe një tjetër në rastin kur Drogba u mbajt nga Abidal.
“Ah sikur të kisha dhe unë ndihmën e VAR-it atë ditë” – shprehet Ovrebo – “Pas pjesës së parë, unë me asistentët ndiheshim sikur e kishim ndeshjen në kontroll. Në fund, kisha një ndjesi krejt ndryshe. Kur shkova në dhoma, i thashë vetes se kjo ndoshta nuk ka qenë nata ime më e mirë. Duhet ta pranoj se për brenda po zieja.
Vetëm kur dola nga fusha dhe u futa në dhomat e zhveshjeve, kuptova gjithçka që kisha bërë. Brenda 2 orëve, unë isha kthyer nga një arbitër i respektuar, në budallain më të madh në futbollin ndërkombëtar. Për t’u larguar me avion nga Anglia, na vendosën një eskortë policie, që të riktheheshim në shtëpi. Kërcënimet me vdekje vinin më shumë nga inati që ekipi i Chelsea nuk e kishte fituar atë ndeshje, se sa nga dëshira e vërtetë për të më vrarë mua dhe familjen time” – tregon gjyqtari norvegjez.
