Veprimi i bordit drejtues të Barcelonës që kërkonte me çdo kusht të ulte rrogat e lojtarëve, duket se ka një shkak shumë të fortë. Klubi është i zhytur në borxhe dhe këtë e konfirmon edhe një prej aksionerëve të mëdhenj të klubit, Jaume Roures.
Themeluesi i kompanisë televizive “Mediapro” që merret me të drejtat televizive edhe të kampionatit spanjoll, ka akuzuar presidentin Bartomeu se ka keqmenaxhuar katalanasit, duke shtuar borxhin.
“Bartomeu do të largohet nga një klub i zhytur në borxhe. Nuk mund të bësh atë që do e të shkosh pastaj në shtëpi duke lënë pas një gropë prej 300, 500 apo 800 milionësh. Barcelona ka një borxh të jashtëzakonshëm që klubi po mundohet të fshehë. Është një borxh që nuk mund të shlyhet në një kohë të shkurtër dhe të cilin pandemia do ta përkeqësojë, pasi do të ulen të ardhurat. Neymar? Nuk ka para për ta blerë”, tha ai, duke u ndalur më pas mbi idenë për të rifilluar ndeshjet.
“Në Spanjë ekziston dëshira të mbyllet sezoni, por unë nuk do të ngutesha, pasi rrezikohet shëndeti, duhen bërë kontrolle të mëdha mbi lojtarët dhe ambientin rreth e rrotull, për të evituar probleme, e kjo mund të zgjatë 3-4 javë. Mospërfundimi i sezonit mund të bëjë të vështirë atë pasardhës, janë gjëra të lidhura. Champions mund të mbyllet pas kampionatit, por kam frikë se në korrik e gusht nuk do të jetë e lehtë të udhëtohet nga një vend në tjetrin. Futbolli ka 140 vite dhe ka kaluar gjithçka. Do të ketë padyshim pasoja, por nuk do të vdesë. Ajo që është e sigurt, është se epoka e transferimeve stratosferike ka përfunduar”, tha Roures.
