Shumë pak e imagjinonin që pas 5 javësh, Skënderbeu të ishte në vendin e 3-të, vetëm një pikë larg dyshes së kreut Kukësi-Tirana. Kësisoj ekipi i Ilir Dajës konfirmoi edhe një herë ndaj Teutës se di të fitojë. Pas shumë dilemave për të ardhmen, stafi drejtues vendosi që të ruajë grupin dhe të investojë për të mbajtur ekipin në elitën e futbollit shqiptar.
Ulja e Ilir Dajës ishte lëvizja fituese pasi tekniku kryeqytetas vijon të mbajë të karikuar ambientin pavarësisht problemeve të mëdha. Në një kohë rekord, Daja ndërtoi një ekip konkurrues duke bërë që objektivat e klubit të ndryshojnë sërish. Pas fitores kundër Teutës, Daja kërkon nga lojtarët një sforco të radhës për të siguruar 6 pikë në 2 javët e ardhshme, ku luajnë me Vllazninë në transfertë dhe presin më pas Luftëtarin në Korçë, shkruan “balkanweb”.
6 pikë në dy javët e ardhshme dhe duke parë kalendarin e rivalëve, Daja dhe stafi drejtues besojnë se mund të mbajnë ekipin në zonën euro, duke shpresuar në këtë mënyrë të konvertojnë sa më shpejt dënimin e dhënë nga UEFA. Kjo duket një rrugë e gjatë dhe shumë e vështirë, por për momentin ky është shpjegimi i vetëm logjik për një ekip i cili e ka të ndaluar të luajë në Evropë për 10-të vite.
