Kryebashkiaku Erion Veliaj ka vizituar sot ambientet e Komunitetit Mysliman në Tiranë, me rastin e Fiter Bajramit.
Në përfundim të kësaj vizite, Veliaj uroi të gjithë besimtarët, por nuk harroi të jepte një mesazh edhe për politikanët, duke thumbuar opozitën.
Teksa ndodhej përballë Parlamentit, Veliaj tha se pasi japin mend, duke iu referuar përfaqësuesve të opozitës, kalojnë trotuarin dhe godasin policët në anën tjetër.
“Faleminderit gjithë vëllezërve dhe motrave që e kanë kthyer Bajramin në festë solidariteti. Thirrja ime është të vazhdojmë këtë solidaritet.
Njerëzit që janë më sherrxhinj dhe helmues i japin mend njerëzve të komunitetit. Sot është një ditë e mbarë për besimtarët, por një ditë e trishtë për politikanët.
Pasi japin mend kalojën rrugën këtu dhe pastaj gjuajnë me tulla dhe gurë policët. Duhet të reflektojmë. Është shumë e rëndësishme që të jetojmë jetën që predikojmë, si nga kjo anë trotuarit ashtu edhe nga ana tjetër. Të nxjerrim mësime nga komunitetet fetare që bëjnë thirrje për vëllazëri dhe bashkëpunim. Paçi paqe të gjithë më shumë dashuri. Ky qytet ka 1 milion banorë po mund ta ruajë unitetin. Qofshi të gjithë të lumtur”, tha Veliaj.
