Së fundmi është firmosur marrëveshja mes qeverisë shqiptare dhe asaj italiane për dokumentin e detajimit të angazhimit prej 95 milion euro.
Lajmin e bëri të ditur Ambasadori i Italisë në Tiranë Fabrizio Buçi përgjatë një konference me Ministrin e Rindërtimit, Arben Ahmetaj.
Buçi pohoi se 5 milion euro grant do të shkojnë për rindërtimin e objekteve publike, që dolën jashtë funksionit nga tërmeti i 26 nëntorit.
Sakaq, kredia e butë prej 90 milion euro do të angazhohet në këto sektorë:
a) Në sektorin e energjisë, për përmirësimin e mëtejshëm të linjave të transmetimit.
b) Në zhvillimin e ekonomisë së detit, për përmirësimin e infrastrukturës portuale dhe peshkimit.
c) Në rritjen e kapaciteteve për përballimin e fatkeqësive natyrore, me përmirësimin e flotës dhe fuqizimin e burimeve njerëzore të emergjencave civile, ku eksperienca e mirënjohur botërisht e Italisë dhe asistenca e vëllezërve italianë, do të jenë një ndihmë e çmuar për Shqipërinë.
