Kryeministrja finlandeze Sanna Marin i kërkoi falje publikut të mërkurën, pasi u shfaq një foto e saj në një klub nate pas testimit pozitiv të Ministrit të Jashtëm me Covid-19. “Kam bërë gabim. Duhet ta kisha shqyrtuar situatën më me kujdes”, tha Marin në një intervistë televizive nga transmetuesi publik Yle të mërkurën mbrëma.
Ministri i Çështjeve Ekonomike, Mika Lintila, ndoqi një ndeshje futbolli mes Finlandës dhe Letonisë të dielën, pavarësisht se u këshillua të shmangte kontaktin me të tjerët, raportoi të mërkurën gazeta Helsingin Sanomat.
Ministri i Mbrojtjes Antti Kaikkonen shkoi në një darkë të shtunën ndërsa Ministrja e Financave Annika Saarikko dhe Ministri i Shkencës dhe Kulturës Antti Kurvinen anuluan pjesëmarrjen e tyre në të njëjtën ngjarje për të shmangur kontaktet, raportoi Ilta-Sanomat të martën.
Të tre ministrat u ekspozuan të premten në një takim ku mori pjesë Ministri i Jashtëm Pekka Haavisto, i cili të shtunën rezultoi pozitiv me Covid-19.
Marin tha se ishte në një restorant kur mori një telefonatë nga sekretari i saj i shtetit duke e informuar për ekspozimin.
“Ai tha se ministrat nuk do të karantinohen, sepse të gjithë janë vaksinuar dy herë”, shkroi Marin në Facebook, duke shpjeguar pse ajo vazhdoi të shoqërohej.
Zyra e Kryeministrit tha më vonë se u kishte dërguar ministrave të ekspozuar dy mesazhe me tekst të shtunën, duke rekomanduar që të shmangnin kontaktet me njerëz të tjerë.
Marin ka marrë dy teste Covid-19 që rezultuan negative. Lintila dhe Kaikkonen gjithashtu kanë rezultuar negativë.
Burimi i lajmit: CNN. Përshtatur nga Tirana Today
