Natyra inatçore dhe hakmarrëse e diktatorit Enver Hoxha, është e mirënjohur. Ajo nuk kurseu të gjithë ata që e ndihmuan, kur ndodhej në vështirësi. Dhe s’do kursente as femrat që e refuzuan. Njëra prej tyre ishte Aurelia Poselli, italiania simpatike, të cilën Enveri 20-vjeçar do ta njihte qëkur ajo ishte 16-vjeçe në qytetin e Gjirokastrës. Familja e saj banonte në një shtëpi ngjitur me të Hoxhës në qytetin e gurtë, dhe familjet kishin krijuar njëfarë miqësie.
Enveri u dashurua pas saj, dhe përmes motrës së tij i dërgoi disa letra. I propozoi edhe të fejoheshin, por mori si përgjigje një refuzim të prerë. Por Enveri nuk u dorëzua, dhe sa herë që rikthehej në qytet i sillte dhurata, dhe vazhdonte t’i propozonte vazhdimisht. Por sjellja e Aurelias, ishte gjithnjë e më e ftohtë. Ai tentoi ta kthente në një revolucionare marksiste, po ajo refuzoi. Kështu miqësia e tyre u zbeh.
Pak kohë më vonë, Aurelia ajo u martua me italianin Giuseppe Terrusi, që kishte ardhur në Shqipëri në vitin 1926, për të shtrirë degët e Bankës Shqiptare në disa qytete të Shqipërisë. Me t’u ngjitur në pushtet, Hoxha nuk hezitoi të marrë hak. Bashkëshorti u arrestua dhe dënua me 10 vjet burg, ndërsa ajo me fëmijët u detyrua të kthehet në Itali.
