Ditën e nesërme në Tiranë, pritet që të zhvillohet një protestë, për shkak të rritjes së çmimit të naftës. Lajmi u bë i ditur nga Harta Digjitale e Aksidenteve rrugore, përmes një postimi në rrjetet sociale.
Shoferëve iu bëhet thirrje që të fikin makinën nga ora 12:00-15:00 në shenjë proteste, dhe kërkohet që çmimi i naftës të bëhet nga 178 lekë, në 150 lekë.
Çmimet e karburanteve u rriten së fundmi për të katërtën herë radhazi që nga lehtësimi i pandemisë. Në pikat e tregtimit të operatorëve kryesorë në vend, nafta dhe benzina po shiten me 3 lekë më shtrenjtë.
Në krahasim me nivelin e ulët prej rreth 148 lekësh, që arritën gjatë periudhës së pandemisë, nafta në vend është shtrenjtuar në pesë muaj, me 21 lekë për litër mbi 14%
Shtrenjtimi i parë u shënua në shkurt 2021, me 6-8 lekë për litër, i dyti në maj me 5 lekë për litër, dhe po me kaq edhe në fund të qershorit dhe në tre lekë ditët e fundit..
