Spitalet dhe shërbimi shëndetësor në ditën e ndërrimit të viteve do të jetë në gatishmëri të plotë për t’ju shërbyer qytetarëve. Ministria e Shëndetësisë dhe e Mbrojtjes Sociale po shqyrton masat që duhet të merren për të përballuar fluksin e pacientëve, nëse do të kenë nevojë për trajtim mjekësor.
Ministrja e Shëndetësisë, Ogerta Manastirliu, i ka bërë këto deklarata gjatë një aktiviteti me fëmijët e pediatrisë, ndërsa u shpërndanë edhe dhurata për fëmijët.
“Dua që të garantoj të gjithë qytetarët që gjatë gjithë kësaj periudhe festive janë marrë të gjitha masat në lidhje me rastet e urgjencës që mund të ndodhin përsa i përket shërbimit 24 orë në 24 nëpër spitale, janë marrë masat, për të mos munguar medikamentet dhe çfarë është më e rëndësishmja, ekipi i mjekëve dhe infermierëve është në gjendje gatishmërie për festat e fundvitit”-theksoi ministrja Manastirliu.
Fëmijët e qendrës së Pediatrisë në Spitalin Universitar “Nënë Tereza” kanë kaluar momente festive, ndërsa të pranishëm ishin edhe aktorët e Cirkut të Tiranë, ku me veprimet e tyre ,krijuan atmosferë ndryshe tek fëmijët e kësaj qendre.
Shefja e Shërbimit të Onko-Hematologjisë, Anila Godo,ka shprehur kënaqësinë, që në këtë pavijon u ndezën dritat dhe ngjyrat e festave, ndërkohë për fëmijët e sëmurë është shumë e rëndësishme ky aktivitet përfundoi ajo.
