Presidenti i Turqisë, Recep Tayyip Erdogan ka bërë me dije se për katër ditë rresht vendi do të hyjë në izolim të plotë.
Duke filluar nga data 23 maj e deri më 27 maj, Turqia do të jetë në izolim total. Sipas Erdogan, kjo bëhet për të frenuar përhapjen e koronavirusit, pasi gjatë kësaj kohe vendi do të kremtojë festën e Fitër Bajramit.
Presidenti turk theksoi se nuk do të ketë një hapje të shkollave gjatë këtij viti akademik. Ai njoftoi se hapja e shkollave do të bëhet në shtator, në vitin e ri akademik.
Ndërsa besimtarët do të kenë mundësi të falen në xhami që nga data 29 maj. Sa i përket të burgosurve që janë kthyer në shtëpi si pjesë e masave kundër COVID-19, Erdogan sqaroi se do të vijojnë në arrest shtëpiak edhe për 2 muaj të tjerë.
Sipas të dhënave të Worldometer, Turqia renditet mes 10 vendeve më të prekura në botë nga pandemia e koronavirusit. Deri më tani, vendi numëron më shumë se 150 mijë raste infektimi dhe 4,171 viktima.
Më shumë se 4,8 milionë njerëz nga e gjithë bota janë prekur nga koronavirusi, ndërsa mbi 318 mijë persona kanë humbur jetën.
