Pjesa më e madhe e shqiptarëve nuk duan të lexojnë. Të tërhequr prej rutinës dhe kohës së kufizuar, thonë se nuk kanë kohë për librin. Por, problemi më i madh qëndron tek fëmijët. A lexojnë ata sa duhet dhe shkollat sa vëmendje i kushtojnë literaturave? Kritiku letrat Agim Baçi në një intervistë për Tirana Today, shprehet se institucionet duhet të jenë më të kujdesshme, pasi një letërsi e keqe, i heq fëmijëve dëshirën për të lexuar.
“Ajo që duhet të na shqetësojë neve, është a lexojnë apo jo fëmijët. Duhet të jetë një këmbëngulje shumë e madhe e prindërve për të dërguar fëmijët drejt librit. Vetëm një ngulitje në fëmijëri e librave, bën që leximi të jetë i përhershëm dhe më vonë. Çështja është që çfarë sugjerohet sot në shkolla, a lihen detyra për librat jashtë-shkollor në muajt e verës.
Sa i takon përzgjedhjes së kurrikulave të duhura, nuk jam i sigurt nëse shihet kaq shumë cilësia e librit apo përzgjedhja të bëhet me kujdes. Apo të kemi një lloj garancie që ajo që sugjerohet në shkolla, do jetë një lloj baze e mirë që t’i dërgojë fëmijët drejt leximit. Kjo vjen edhe për shkak të ç’mitizimit të shkollës. Gjithmonë shoh një ankesë për librat që sugjerohen. Duhet të bëhet kujdes, pasi mund t’iu heqim dëshirën për letërsinë, nëse i sugjerojmë libra të këqij.”
Mos përzgjedhja e duhur e kurrikulave shkollore, ka bërë që shpesh fëmijët e pas ’90-ës të kenë boshllëqe në informacione. Kjo pasi nuk përzgjidhen librat e duhur për të pasqyruar periudha si ajo e komunizmit.
“Po vjen një brez i cili nuk ka dijeni se çfarë i ka ndodhur gjyshërve, prindërve apo çfarë ka ndodhur në Shqipëri këto 50 vite. Dhe për mendimin tim, letërsia është rruga më e mirë për ta thënë këtë. Prej kohësh, unë kam kërkuar që në shkolla të futen libra si “Rrno për me tregue” i At Zef Pllumit një histori e domosdoshme për tu njohur, apo Eqerm Bej Vlora i cili është një lloj historie kombinuar me letërsi. Pra, të kemi një orë të rikthimit të atyre shkrimtarëve të mohuarve për 50 vite, të cilët ende mbeten si të pazbuluar. Ajo pjesë e mohuar, ajo pjesë e dhënë gabim dhe letërsia e sotme duhet të jenë të shpjeguara qartësisht që një brez ta dijë edhe nëpërmjet letërsisë të njohë njerëzoren dhe historinë. Nëse për shumë kohë i kthehet kurrizi këtyre librave, atëherë kemi një lloj mosdëshire që këto gjëra të thuhen.” TIRANA TODAY
