Videot që përhapin “fake news” e konspiracione nga më të ndryshmet, marrin ndëshkime nga rrjetet sociale. Një gjë e tillë ka ndodhur edhe me presidentin amerikan Donald Trump. Një deklaratë mjaft e fortë nga ai, ka vënë menjëherë në lëvizje rrjetet sociale.
Facebook dhe Twitter kanë penalizuar Trump, pasi kishte publikuar një deklaratë të tijën ku pretendonte se fëmijët ishin “pothuajse imunë” ndaj koronavirusit.
Facebook fshiu videon nga një intervistë që Trump dha për ‘Fox News’, duke thënë se ajo përmbante “dezinformata të dëmshme për COVID”.
Po kështu Twitter bllokoi një postim që kishte të bënte me të njëjtën intervistë. Shëndeti Publik në SHBA e ka bërë të qartë se fëmijët nuk kanë imunitet ndaj COVID-19. Një zëdhënës i Facebook tha të mërkurën në mbrëmje: “Kjo video përfshin pretendime të rreme se një grup njerëzish janë të imunizuar nga COVID-19, që është një shkelje e politikave tona rreth dezinformimit të dëmshëm të COVID”.
Më herët Trump insistonte në qasjen e tij ndaj koronavirusit të ri, duke injoruar këshillat e shkencëtarëve, të cilët kërkojnë të bëhet më shumë për frenimin e përhapjes.
