Banorët e Holtës në Gramsh kanë folur lidhur me ngjarjen e rëndë që tronditi vendin ditën e sotme, ku një vajzë 25-vjeçare u gjet e mbytur në dalje të kanionit, ndërsa dhjetëra turistë të tjerë gjendeshin të rrezikuar.
Një prej banorëve u shpreh për “Report Tv” se: “Ishin shumë persona në kanion, të tjerët dolën… Kjo që ndodhi është hera e parë. Nuk ka njeri që ti udhëzojë turistët, vetëm ajo që u themi ne.”
Ndërsa një tjetër nënvizoi se shkak janë bërë shirat e rrëmbyeshëm. “Turistët u futën por s’e kuptuan rrjedhjen e lumit. U mobilizuan të gjithë, por uji ishte i menjëhershëm dhe vajza nuk shpëtoi. Kjo njihet si zonë me prurje të menjëhershme, aq më tepër verës. Se kuptoj si nuk e kuptuan njerëzit brenda zhurmën e ujit”, tha ai.
Një turist i cili ishte pjesë e grupit që u bllokua këtë pasdite në kanionin e Holtës, tregon se si arriti të shpëtonte vetë dhe njërin nga katër fëmijët.
“Ne kemi shpëtuar njëri tjetrin. Na i sillte rryma njëri tjetrin nëpër duar, aq e fortë ishte. Vajzën e pamë që e mori uji, por ishim shumë larg dhe nuk bënim dot asgjë.
Fëmijën që shpëtova ma solli dallga e ujit në duar. Ai ishte me të atin, të cilit i shpëtoi nga duart si pasojë e ujit të rrëmbyeshëm dhe ma solli mua në duar”, u shpreh ai.
