Me anë të një postimi në rrjetet sociale, Spartak Ngjela, avokati dhe analisti i njohur, e ka vlerësuar protestën e 16 shkurtit si “korrupsioni kundër korrupsionit”. Sipas tij, Berisha u diskreditua, ndërkohë që Ed Rama u fsheh. Mes të tjerave Ngjela është i mendimit se planin e zgjuar të mbrojtjes së Kryeministrisë e kanë bërë amerikanët.
Ja postimi i plotë:
Do të vazhdojnë të ushqejnë shpresën e destabilizimit të Shqipërisë?
Hordhitë Berisha dështuan edhe pse me një polici pothuajse inekzistente. Kurse kryeministri la kryeqytetin dhe shkoi në Vlorë. Turp për të! E gjithë shfaqja ishte ky gjykim: korrupsioni kundër korrupsionit.
Të revoltuarit që thyen xhamat e ndërtesës së kryeministrisë ishin injorantë të paguar e asgjë më. Por edhe pse të tillë, nuk arritën të krijonin revoltë popullore.
Plani qesharak i Saliut ishte: një revoltë e dhunshme me individë të blerë që duhej të sillte një ndezje të përgjithshme popullore. Por fitoi një hiç të madh. Vajti të pushtonte një ndërtesë të boshatisur se e mendonte si kështjellë për të marrë Shqipërinë. Dhe dështoi. Njëlloj si Don Kishoti me mullinjtë e erës. Ky ishte diskreditimi i marrëzisë Berisha që, nga halli i frikës antikorrupsion, kërkoi të digjte Tiranën e mandej Shqipërinë. Asgjë.
Po Rama, kryeministri pa zyrë i Shqipërisë, ku ishte? Asgjëkundi. Ishte i fshehur në Vlorë, sepse kryeqytetin ia kishte lënë në dorë hordhive të Saliut, me një ministër të Brendshëm inekzistent, dhe me një polici inaktive. Por edhe me një plan mbrojtës të Kryeministrisë, që kuptohej se ia kishte bërë FBI, pa e pyetur fare kryeministrin endacak të Shqipërisë.
Turp! Këta vjedhës duhet të mos i shohë më shoqëria shqiptare. Po socialistët?
Ata janë mazhorancë. Nëse ende nuk binden që Rama do destabilizimin e Shqipërisë, nuk janë fare këtu. Ndërrimi i këtij kryeministri në fakt i heq korrupsionit bilateral çdo kartë. Por a do ta bëjnë dot socialistët duke vendosur një kryeministër të pakorruptuar?
Të shohim!
