Kryeministrit Edi Rama bëri më herët një deklaratë në media për të nisur një fushatë monitorimi për cilësinë e punës në administratë.
Këtë iniciativë të kryeministrit Rama analisti Fatos Lubonja e sheh me shqetësim. Lubonja në rubrikën “Opinion” u shpreh se defektet në punën e bërë në administratë duhet të shihen nga institucionet dhe jo nga populli.
Lubonja tha se, kjo mban erë pastrimi të institucioneve nga kundërshtarët. Gjithashtu, sipas tij është shqetësuese që pushteti të jetë në duart e një partie apo të një personi.
“E shikoj me shqetësim këtë situatë. Këto janë metoda ekstra-institucionale dhe kurdo i shoh me shqetësim. Sot krijohet një grup monitorimi në bashkëpunim me popullin për të parë se cilat janë defektet e punës në administratë. Në fakt defektet duhet t’i shohin institucionet. Më shumë kjo mban erë pastrimi të institucioneve nga kundërshtarët. Të jetë i gjithë pushteti në duart e një partie, të një personi, e shoh shqetësuese. Rrezikohemi nga pushteti i pakontrolluar”, tha Lubonja.
Duke u ndalur tek apeli i bërë sot nga kryeministri Rama drejtuar presidentit të zgjedhur, për të qenë mbi palët, analisti Lubonja tha se qëndrimet e tyre nuk janë normale, duke iu referuar edhe atyre gjatë fushatës elektorale.
“Mendoj se gjithë fushatat ka qenë anormale nga kjo pikëpamje me pozicione të çuditshme nga të gjitha palët. Edhe pozicioni i Metës nuk ishte normal, nisur nga fakti se ishte zgjedhur president. Po kështu edhe qëndrimi i Bashës nuk ishte normal, pasi kundërshtoi Ramën bëri marrëveshje me të. Po ashtu edhe qëndrimi i Ramës, duke sulmuar LSI, e duke i quajtur shushunja, e tani bën këto lëvizjet e tjera”, u shpreh Lubonja.
