Skënderbeu e bën të vështirë përballjen me Lushnjë, por në fund arrin të përmbysë gjithçka falë një super Sowe që shënon tregolësh. Pas dy javësh të dështuara ku u mposhtën nga Kukësi dhe Laçi, korçarët janë rikthyer tek fitorja në javën e 33 përballë Lushnes. Kryesuesit e Kategorisë Superiore kanë marrë një fitore të rëndësishme dhe të vuajtur në fusni e Lushnjes, që mban vendin e fundit në renditje dhe që ka siguruar prej kohësh rënien nga kategoria.
Pak minuta nga fundi i pjesës së parë është Pergjini që gjen golin e avantazhit duke tronditur skuadrën e Ilir Dajës. Ndërsa në fillim të së dytës janë sërish vendasit që dyfishojnë rezultatin me anë të Papës. Por nuk vonon dhe vjen reagimi i Skënderbeut me Sowe, i cili në harkun e 20 minutave arrin të gjejë tre herë rrugën e rrjetës dhe përmbys ndeshjen. Ndërsa për të mbyllur gjithçka mendon James vetëm 5’ minuta nga përfundimi. Falë kësaj fitoreje, bardhekuqtë kanë shkuar në kuotën e 72 pikëve në renditje, 11 më shumë se Kukësi i vendit të dytë, që do të luajë në orën 19:00 në fushën e Teutës.
Ndërkohë, vazhdon problemet për Partizanin, që ka shpërdoruar një avantazh prej dy golash në fushën e Luftëtarit, me këta të fundit që kanë arritur të barazojnë 2-2 dhe të marrin një pikë shumë të rëndësishme për vendin e tretë.
Gjirokastritët, në fakt, kanë 52 pikë në renditje, pesë më shumë se Partizani i vendit të katërt kur kanë mbetur edhe tri javë nga fundi i kampionatit. Asani (26’) dhe Gojkovic (30’) i kanë dhuruar miqve avantazhin e dyfishtë në pjesën e parë, por Luftëtari është kundërpërgjigjur në të dytën me Abazaj (52’) dhe Rapo (70’).
Në orën 16:00 është luajtur edhe takimi Flamurtari-Laçi, i mbyllur në barazim pa gola.
