Familjarët e 51-vjeçarit Kujtim Koxha, i cili vrau me breshëri kallashnikovi tre punonjësit e bashkisë, janë ende të tronditur. Ata janë të frikësuar, aq sa nuk kanë guxim për të dalë tek dera e shtëpisë. Vrasja e trefishtë ka shokuar familjarët e vrasësit, e ndërsa thonë se ndjehen të turpëruar.
“Kujtimi na ka marrë fytyrën. Na ka turpëruar jo vetëm këtu në fshat e në zonë, por në të gjithë vendin. Që nga dita kur ndodhi ngjarja, ne nuk guxojmë të dalim as tek oborri i shtëpisë.
Nuk e dimë pse e bëri, dhe si e bëri atë krim të tmerrshëm. Edhe sikur të na falin familjarët e viktimave, ne nuk mund t’u dalim më para syve”.
Menjëherë pas ngjarjes, familja Koxha është ngujuar. Nga ana tjetër, autori i krimit makabër nuk ka shprehur pendesë për marrjen e tri jetëve, dhe lënien jetimë të fëmijëve të viktimave.
Dy ditë më parë ai është justifikuar para oficerëve të policisë gjyqësore me fjalët se njëri nga viktimat e kishte fyer, dhe e kishte qëlluar me shuplakë.
Mësohet se policia ka marrë në mbrojtje familjen e autorit të vrasjes së trefishtë, duke kryer shërbim përgjatë 24 orëve. Ata i druhen një hakmarrje të mundshme nga të afërmit e viktimave.