32-vjeçari Lear Kurti ndërroi jetë mbrëmjen e mërkurës, pasi u ndalua nga forcat e policisë në Komisariatin nr.3 të Tiranës. Pas arrestimit, gjendja e tij shëndetësore u përkeqësua duke shfaqur të dridhura dhe rrjedhje sekrecionesh nga goja. Fillimisht pati raportime se Lear Kurti vuante nga epilepsia, por kjo u hodh poshtë nga babai i tij birësues.
Pasditen e djeshme, AMP doli sërish me deklaratë për shtyp, pasi ekspertiza mjeko-ligjore vërtetoi se Lear Kurti ndërroi jetë pasi gëlltiti një qese e dyshuar me lëndë narkotike, pa përcaktuar nëse pësoi hemorragji në stomak apo overdozë.
Mosqartësimi i rrethanave të vdekjes së Kurtit ngjalli dyshime se ai u dhunua nga forcat e rendit, për shkak se nuk iu bind paraprakisht urdhrit për ndalim, por AMP e hodhi poshtë versionin e dhunës së patrullës policore ndaj tij.
Pas ekzaminimeve mjekësore, familjarët tërhoqën trupin e viktimës dhe hapën dyert e mortit në banesën tek ish-parku i Autobusave. Mësohet se familja e Kurtit ka kërkuar që vdekja e të riut të mos përdoret nga politika për qëllimet e tyre.
Ata kanë kërkuar që politikanët nëse duan të shprehin ngushëllimet e tyre, ta bëjnë këtë gjë si qytetarë të thjeshtë e jo me kamera e regji me vete. Përveç politikanëve, edhe mediave u është ndaluar të filmojnë homazhet për të ndjerin Kurti.
