Prokuroria e Tiranës kërkon që të caktohet masa “Arrest me burg” për 7 nga 8 të arrestuarit e falsifikimit të 150 mijë biletave të transportit urban në Tiranë. Ndërsa për njërin ‘’detyrim paraqitje’’.
Ata ranë në pranga pak ditë më parë, në operacionin e ndërmarrë nga policia, “Bileta e falsifikuar”. Duke bashkëpunuar me njëri-tjetrin kanë falsifikuar bileta të transportit urban në kohë dhe periudha të ndryshme, me qëllim shmangien e detyrimeve tatimore dhe përfitim financiar të disa shoqërive operatore.
Konkretisht, prokuroria ka kërkuar arrest me burg për Ferdinand Ibrahimin dhe djalin e tij Anastas Ibrahimi, si edhe për të arrestuarit: Fatos Vrapi, Erisa Vora, Klodiana Qato, Aldi Duka si edhe Lulzim Allaraj, ndërsa për Albana Vrapin, Prokuroria ka kërkuar masën e detyrimit me paraqitje.
Ibrahimi ka mohuar akuzat duke u shprehur se nuk ka dijeni për biletat e falsifikuara, ndërsa theksoi se biletat e gjetura në makinën e tij janë të vjetra dhe nuk ishin në përdorim.
