Deputeti Ralf Gjoni ka ndarë me publikun një histori personale, ku ai ka mbetur i zhgënjyer nga një restorant në Syrin e Kaltër. I ftuar në emisionin ’45-minuta’ me gazetarin Denis Minga, ai ka rikujtuar edhe një herë një ngjarje aspak të këndshme në një nga restorantet në Syrin e Kaltër, teksa kthehej me familjen nga pushimet në Greqi.
Ralf Gjoni tregoi sesi pronari i restorantit e kishte kërcënuar me jetë, duke i thënë se do ta qëllonte me plumb në kokë. Madje ai e paralelizoi eksperiencën e tij me atë të turistëve spanjollë, të cilët u kërcënuan disa javë më parë nga pronari i një resorti në Porto Palermo.
“Jo, ne u çuam nga lokali dhe u kërcënuam me plumb në kokë. Këta kriminelë kanë zaptuar vendin dhe ambientet. Arrogantë ke edhe në Francë edhe në Kanada edhe në Tunizi. Por të kërcënojë jetën e tjetrit, ata arrestohen direkt. Me Mihalin është ajo, mosfunksionimi i shtetit. Fajin s’e ka Kokëdhima, por mungesa e shtetit. Fajin e ka shqiptari që shkon dhe voton këtë lloj politike. Por kam besim se do të arrijmë më përpara”.
