Përfundon ndeshja e luajtur në Sevija mes Spanjës dhe Suedisë, takim i cili u mbyll me rrjeta të paprekura, një sfidë totalisht e dominuar nga ekipi i Luis Enrike.
Portieri i Suedisë, Olsen ishte protagonist me disa pritje, teksa Morata shpërdoroi një rast të artë në minutën e 37.
Por, suedezët ishin pranë avantazhit me Isak, në minutën e 40, që goditi, dhe Markos Lorente devijoi topin që po shkonte në rrjetë, duke e çuar në shtyllë.
Në minutën e 61, Berg humbet një rast të mirë, gjysmë metri larg vijës fatale. Me portën e boshatisur, kapiteni bëri më të vështirën, duke e nxjerrë topin jashtë kuadratit.
12 minuta më vonë, Spanja pati një tjetër rast me Dani Olmon, i cili provoi me një gjuajtje në hyrje të zonës, por gjuajtja e tij u ndal nga mbrojtësit e Suedisë.
