Etrit Berisha një ditë më parë ka festuar ditëlindjen e tij të 29-të. I kontaktuar nga mediat pranë ekipit të Atalantës, ku aktivizohet aktualisht gardiani kuqezi, ka folur për eliminimin nga Europa League nga Dortmund, garën në Serie A, si dhe ditëlindjen. Berisha është shprehur i bindur që bergamnesket do të sigurojnë edhe këtë edicion pjesëmarrjen në garat europiane edhe pse gara është shumë e fortë.
DITËLINDJA – I kontaktuar nga mediat pranë Atalantës, portieri shqiptar ka treguar edhe dhuratën më të mirë për këtë vit. “Sigurisht, sigurimi i Europës dhe mbyllja e kampionatit me një arritje të tillë, do të ishte dhurata më e bukur”, është shprehur fillimisht portieri.
SERIA A – Në lidhje me këtë objektiv, gardiani kuqezi e di vështirësinë dhe skuadrat, të cilat duhen mposhtur. “Unë mendoj që do ta arrijmë Europën. E di që është një garë e vështirë, pasi bëhet fjalë për tri skuadra që duhet të ndajnë dy vende, por me 70% them se do t’ia dalim ne. Kemi një kalendar në favor, që besoj se na bën më të avantazhuar sesa të tjerët”, ka vijuar shqiptari.
MILANI – Një prej skuadrave në formë në Serinë A momentalisht është Milani i drejtuar nga Gatuzo, e cila gjithashtu synon një vend në Europë. Berisha e pranon rivalitetin nga kuqezinjtë, ndërkohë që tregon edhe çelësin e suksesit për të tijtë. “Sampdoria, Torino dhe Milan janë gjithashtu në lojë sikurse edhe ne për kualifikimin në Europë.
Megjithatë, vendimtare do të jetë që ne të grumbullojmë pikët e sfidave në transfertë. Nisur nga sfida e radhës me Bolonjën që është shumë e rëndësishme. Pikët në përballjet direkte do të na ndihmojnë shumë dhe ne jemi shumë të vendosur që të mbyllim një sezon të suksesshëm”, ka deklaruar Berisha.
LIGA E EUROPËS – Ndaj Dortmundit, mungesa e fatit bëri që bergamaskët të eliminoheshin me barazimin në ndeshjen e kthimit pas një goli të pësuar në të 83-tën minutë. “A mund ta bllokoja atë top? Sigurisht që kam gabuar, por isha i fundit dhe peshoi më shumë. Gjithsesi, në raport me të dy ndeshjet e luajtura, them që kemi merituar më shumë”, ka përfunduar portieri i Atalantës dhe i Kombëtares shqiptare.