Presidenti i Turqisë, Recep Tayyip Erdogan, ka ritheksuar se Turqia nuk synon territorin dhe burimet natyrore të askujt.
Përmes një lidhjeje të drejtpërdrejtë me video në ceremoninë e hapjes së qarkores Amasya, Erdogan sqaroi se nuk do të lejojë që askush t’i cenojë interesat e Turqisë.
“Ne nuk kemi plane për të drejtën, ligjin, territorin, detin dhe burimet natyrore të askujt. Por, ne nuk lejojmë askënd të shkelë mbi të drejtat, ligjin dhe interesin tonë”, tha ai.
Erdogan tha se vendi i tij zhgënjeu ata që prisnin që Turqia “të përulej”. Sipas tij, nëse kishte ndonjë kërcënim ndaj Turqisë, qoftë në Irak, Siri, Libi apo në Detin Egje, Turqia tregoi forcën e saj dhe qëndrimin e vendosur kundër kërcënimeve pa asnjë hezitim.
“Arsyeja pse ata që kundërshtuan me zë të lartë hapat e Turqisë, por nuk mund të arrinin prani në terren, është se ata shohin fuqinë që ka vendi ynë në çdo fushë”, shtoi ai.
Sa i përket qarkores në Amasya, ai tha se do të shkurtojë udhëtimin nga 30-minuta në 7-8 minuta, raporton Anadolu Agency.
