Presidenti turk, Recep Tayyip Erdogan, ka ofenduar presidentin Macron, duke thënë se Franca po drejtohet nga një lider “i paaftë”.
Prej kohësh tashmë, Erdogan dhe Macron shkëmbejnë fyerje ndaj njëri-tjetrit, pasi kanë mosmarrëveshje për çështjen e Libisë dhe konfliktin detar mes Turqisë dhe Greqisë.
Macron e zemëroi Ankaranë javën e kaluar kur kritikoi mënyrën sesi Turqia po qeveriset nga Erdogani, duke thënë se ky vend “meritonte diçka tjetër”.
Mosmarrëveshjet mes Turqisë dhe Francës u përshkallëzuan më shumë, pasi Franca muajin e kaluar dërgoi anije detare në Mesdheun lindor për të ndihmuar anijet luftarake greke.
Erdogan tha në një takim virtual të partisë së tij në pushtet se “logjika e Macronit, duke fajësuar Turqinë për problemet rajonale, nuk funksionoi”.
Lidhur me Libinë, mosmarrëveshjet mes dy vendeve qëndrojnë në faktin se Turqia mbështet qeverinë e njohur nga OKB-ja në Libi. Ka dyshime se Franca favorizon një qeveri paralele dhe liderin e saj, gjeneralin, Khalifa Haftar, por zyrtarisht e mohon këtë.
