Presidenti i Turqisë Erdogan ka thirrur mbledhjen e Këshillit të Sigurisë, ku në fokus të diskutimeve do të jetë Greqia. Mediat turke raportojnë se në këtë mbledhje do të shqyrtohen hapat që Turqia do të marrë ndaj Greqisë lidhur me çmilitarizimin e ishujve në Egje.
Recep Tayyip Erdoğan do të mbledh Këshillin e Sigurisë Kombëtare, pak orë pasi ministri turk i Mbrojtjes Hulusi Akar mbajti një telekonferencë urgjente me shefin e Shtabit të Përgjithshëm dhe shefat e armatimeve.
“Mendoni se mbështetja që ju vjen nga SHBA-ja dhe Europa mund t’ju shpëtojë? Ata nuk ju shpëtojnë. Jo. Në Trakinë Perëndimore, çdo klubi apo shkolle që shqetësohet sepse përdoret termi “turk”, dua t’i dërgoj një mesazh Greqisë, kryeministrit dhe presidentit të tyre, ejani bashkë”, tha presidenti turk.
Deklaratat e reja nxitëse të Erdoganit vijnë pavarësisht mesazheve të qarta të dënimit nga Uashingtoni dhe Brukseli.
“Sovraniteti dhe integriteti territorial i të gjitha vendeve duhet të respektohet dhe të mbrohet. Sovraniteti i Greqisë mbi këto ishuj nuk është i diskutueshëm. Ne u bëjmë thirrje të gjitha palëve që të përmbahen nga retorika dhe veprimet që mund të përshkallëzojnë më tej tensionet”, tha Departamenti i Shtetit të hënën.
Reagimet ndërkombëtare kundër retorikës së Erdoganit
“Ne presim që Turqia të ndalojë retorikën, të respektojë sovranitetin e vendeve anëtare”, tha përfaqësuesi i Komisionit, Peter Stano.
Pas ambasadorit grek dhe amerikan, në Ministrinë e Jashtme turke është thirrur për shpjegime edhe ai gjerman. Arsyeja janë deklaratat e nënkryetarit të parlamentit gjerman, i cili e krahasoi presidentin Erdogan me një… miun e kanalizimeve, siç tha ai, për instrumentalizimin e refugjatit.
“E përshkrova zotin Erdogan si “miu i kanalizimeve”. Miu është i vogël, i lezetshëm, por edhe i zgjuar. Dhe dinak. Kjo është arsyeja pse ai ekziston si personazh kryesor në tregimet për fëmijë”, tha nënkryetari i Bundestagut gjerman Wolfgang Kubicki.
Burimi i lajmit: hellas.postsen. Përshtatur nga Tirana Today
