Mjeku epidemiolog, Taulant Muka mendon se vendosja e maskave nuk ul shkallën e infeksionit të Covid-19.
Për Mukën, vëmendja nuk duhet të përqendrohet vetëm tek rastet e shtuara të infeksionit, por kryesisht tek menaxhimi i numrit të vdekshmërive.
Sipas ish-zv.Ministrit të Arsimit, asnjë vend, madje edhe Shqipëria, nuk duhet të adaptojë masat e një shteti tjetër.
”Përqendrimi i vëmendjes nuk duhet të jetë vetëm në shtimin e rasteve. Ne duhet ta zhvendosim vëmendjen tashmë tek numri i personave simptomatikë, tek shtrimet dhe gjithashtu edhe vdekshmëria. Nëqoftëse shikojmë Suedinë, megjithëse ka raste të shtuara, shikojmë që niveli i vdekshmërive është i ulët.
Madje nga Janari në Shtator, vdekshmëria është më e ulët krahasuar me vitin 2013 dhe e njëjtë me vitin 2015. Besoj që alarmi nuk duhet të jetë si më parë. Në besimin tim, shikoj shumë veprime që po merren në botë, që të mos jenë tashmë të bazuara vetëm në shkencë, por të jenë edhe vendime politike, siç është edhe vendosja e maskave’’, tha Muka në Ora News.
