“Doktori ishte i dehur, me cigare në dorë para një fëmije 40 ditësh. Sapo e pa djalin, më tha thjesht Down”,–kështu Anila e mori vesh lajmin që do t’i ndryshonte jetën rrënjësisht.
Pasi dështuan me lindjen e parë, ata do të bëheshin prindërit e Marvit. Vështirësitë dhe problemet do të përfundonin. Por, një fjalë e thënë mizorisht prej mjekut, tronditi çiftin. Anila Çela thotë për Tirana Today se nuk dinte asgjë më parë sa i takon kësaj sindrome dhe askush nuk i shpjegonte gjë. Përballë një të panjohure tronditëse, jeta familjare filloi të lëkundej. Probleme që u reflektuan edhe në jetën bashkëshortore. Anila ishte e vetme në rritjen e Marvit.
Edhe pse në ato vite ishte e vështirë të gjeje një qendër për fëmijët me Sindromën Down, Anila nuk do ta linte djalin të veçuar. Ndaj e fut në çerdhe që në moshën 1 vjeçare, e sot Marvi është në klasë të dytë në një shkollë publike.
Ditët e tyre janë të qeta, me humor, me vështirësi. Janë bisedat mes një nëne dhe të birit. Duke mos pasur mundësi për ndryshe, Anila e merr djalin edhe në punë.
Marvi është një fëmijë i veçantë, por jo prej fizikut të tij. Ai ka ëndrra shumë, aq të mëdha saqë as vështirësia në të folur, nuk e pengon për t’i shprehur ato. Thotë për Tirana Today se do të bëhet polic.
Por, e nesërmja e tremb Anilën.
Marvi ka nisur terapinë në moshën 4 vjeçare. Por, për Anilën, ka qenë shumë vonë. Ajo shton se shteti duhet të krijojë mundësi për më tepër qendra të specializuara.
Larg syve paragjykues të shoqërisë, për Anilën dhe Marvin, vendi i preferuar është kopshti zoologjik. Sepse aty askush nuk e sheh me mëshirë. Tirana Today
