Policia ka dhënë zyrtarisht versionin e ngjarjes për të shtënat me armë në lokalin e natës në Dhërmi. Për këtë ngjarje është arrestuar Emiljano Nina 23 vjeç nga Tirana. Policia thotë se Nina ka qëlluar 4 herë me armë në ajër, por fatmirësisht nuk pati asnjë të lënduar.
Sipas hetimeve, rezulton që 23-vjeçari Nina është konfliktuar me një person tjetër për motive të hershme mes tyre, ndërsa situata agravoi më tej. Në këtë moment, Emiljano Nina nxorri armën dhe qëlloi në ajër, duke shkaktuar panik tek pushuesit që ndodheshin në lokal. Uniformat blu sekuestruan pistoletën me dy plumba të 23-vjeçarit.
Materialet hetimore do t’i referohen Prokurorisë Vlorës për veprën penale ”Mbajtja pa leje dhe prodhimi i armëve shpërthyesedhe municionit” dhe ”Prishja qetësisë publike”.
Njoftimi i policisë
Strukturat Policore të Komisariatit të Policisë Himarë në vijim të veprimeve hetimore dhe procedurale për zbardhjen e ngjarjes së sotme të ndodhur në Dhërmi, kanë bërë të mundur dokumentimin e saj.
Nga veprimet e para të kryera ka rezultuar se në një lokal shtetasi Emiljano Nina është konfliktuar për motive të dobëta (të hershme) me një tjetër shtetas e për pasojë konflikti ka agravuar më tej, ku shtetasi Emiljano Nina ka shtënë 4 herë me armë zjarri në ajër.
Nga të shtënat nuk ka persona të lënduar. Në përfundim të veprimeve hetimore është kryer arrestimi në flagrancë i autorit, shtetasit Emiljano Nina, 23 vjeç, banues në Tiranë.
Po në kuadër të veprimeve të kryera është bërë e mundur dhe gjetja e sekuestrimi armës së zjarrit pistoletë me dy fishekë.
Materialet hetimore do t’i referohen Prokurorisë së Rrethit Gjyqësor Vlorë për veprën penale ”Mbajtja pa leje dhe prodhimi i armëve shpërthyese dhe municionit”, ”Prishja qetësisë publike”, parashikuar nga neni 278 dhe 274 të Kodit Penal.
