Policia e Shkodrës në një aksion ka mundur të vërë në pranga 4 persona, me tyre edhe Astmer Bilali, 29 vjeç, lindur e banues në Shkodër. Por emri i Bilalit nuk është i panjohur për policinë e mbi të gjitha ai ka qenë ish-kampion boksi.
Në vitin 2012 Astmer Bilali ishte boksieri i vetëm nga katër kuqezinjtë që mundi të kualifikohej në turneun kualifikues të Lojërave Olimpike “Londër 2012”. Por, humbja që pësoi në raundin e 1/8-ve me boksierin rumun Ionut George i dha fund edhe ëndrrës kuqezi për t’u përfaqësuar për herë të parë në historinë e saj me sportistë në një eveniment si Lojërat Olimpike.
Përveç meritave ai ka qenë i njohur edhe në botën e krimit. Në disa njoftime të bëra nga policia ju mund të njiheni me veprimtaritë dhe të kaluarën e tij kriminale.
Janar 2014
Policia e Shkodrës arrestoi ish-boksierin e Vllaznisë, Astmer Bilali. Lajmi ishte dhënë përmes një njoftimi të Drejtorisë së Policisë të Qarkut Shkodër. Në njoftimin e policisë thuhej se: “U bë arrestimi në flagrancë i shtetasit Astmer Bilali, vjeç 25, lindur dhe banues në lagjen “Guerrile” të qytetit Shkodër. Arrestimi i shtetasit Astmer Bilali u bë pasi gjatë kontrollit të ushtruar në banesën e tij nga shërbimet e policisë të Komisariatit të Policisë Shkodër u gjetën dhe sekuestruan në cilësinë e provës materiale 1 armë zjarri automatik model 56 mm dhe 30 copë fishekë, të cilat ky shtetas i mbante pa leje. U kryen veprimet proceduriale dhe materialet në ngarkim të tij iu kaluan për ndjekje të mëtejshme Prokurorisë së Rrethit Gjyqësor Shkodër, për veprën penale të “Mbajtjes pa leje të armëve dhe municioneve”, parashikuar nga neni 278/3 i Kodit Penal”.
Janar 2017
I shpallur në kërkim për “Vjedhje me armë” që prej 8 qershorit të vitit të shkuar, policia e Shkodrës ka vënë në pranga gjatë së martës shtetasin Astmer Bilali, 28 vjeç, banues në Shkodër. Arrestimi i këtij shtetasi erdhi gjatë operacionit “ICE MAN” për të cilin policia thotë se u finalizua me sukses. Më datë 31.01.2017, nga shërbimet e Drejtorisë Vendore të Policisë Shkodër, në bazë të informacioneve të siguruara në rrugë operative, për vendodhjen e shtetasit në kërkim, bënë të mundur finalizimin me sukses të operacionit policor të koduar “ICE MAN”. ASTMER BILALI AKUZOHET PËR “VJEDHJE ME ARMË” Si rezultat i këtij operacioni, në zonën e Mabës së Lezhës, i strehuar në një banesë, u bë e mundur kapja dhe ndalimi i shtetasit: Ky shtetas u ndalua nga shërbimet e Policisë pasi D.V.P Shkodër më datë 08.06.2016 e ka shpallur në kërkim me urdhër nga Prokuroria Shkodër me vendim nga Gjykata Shkodër, e cila e ka caktuar masën e sigurisë “Arrest në burg” për veprën penale “Vjedhje me armë” parashikuar nga neni 140 i Kodit Penal. Materialet proceduriale do ti referohen Prokurorisë për veprime të mëtejshme”, thuhej në njoftimin e policisë./TIRANA TODAY/
