Dënohet me 5 vite burg Qemal Shaskaj, i riu shqiptar që përfundoi në prangat e policisë italiane vitin e kaluar në një vilë të vogël në Giulianello. Shaskaj, i cili punonte si murator në Itali, u kap me 27 kg kokainë.
Vendimi u dha nga gjyqtari i Gjykatës së Latinës, Mario La Rosa, ndërsa prokurori kërkoi një dënim prej 9 vitesh.
Më 13 dhjetor, në apartamentin e shqiptarit, policia gjeti dy çanta, brenda të cilave kishte 25 pako me një total prej 27 kg kokainë të pastër. Më pas, substanca do të ndahej në rreth 50 mijë doza, duke i dhënë më shumë se 3 milionë euro fitime.
Po ashtu, u zbuluan edhe dy armë (kalibri 9 dhe 7.65), një armë gjahu dhe një municion i madh.
Gjatë procesit gjyqësor, ai u lirua nga akuzat për posedim të armëve të zjarrit dhe marrjen e sendeve të vjedhura.
