Zbardhet identiteti i 25-vjeçarit, i cili gjeti vdekjen mbrëmjen e djeshme në Durrës. Viktima është identifikuar si Ramazan Bata, nga Burreli, i cili vetëm 2 ditë më parë kishte filluar punë si shpërndarës picash.
25-vjeçari po udhëtonte me një motor tip “Dajang”, në momentin kur u përplas fillimisht nga një autobus, e më pas nga një tjetër automjet, që e ka marrë zvarrë për disa metra.
Mësohet se Ramazan Bata ishte student në universitetin Aleksandër Moisiu, ndërsa më parë ai ka punuar në një lavazh në Durrës. Familjarët e 25-vjeçarit kanë shprehur dhimbjen e madhe në rrjetet sociale ku kanë ndarë edhe foto të tij.
Në lidhje me aksidentin tragjik, policia ka arrestuar dy persona: F. T., 54 vjeç, banues në Tiranë dhe P. T., 49 vjeç, banues në Krujë.
Arrestimi i tyre u bë për shkak se në autostradën “Tiranë-Durrës”, tek mbikalimi i këmbësorëve në Shkozet, mjeti tip “Fiat Dukato” që drejtohej nga shtetasi F. T., dhe mjeti autobuz tip “Skania” që drejtohet nga shtetasi P. T., janë përplasur me motorin tip “Dajang”, me drejtues shtetasin R. B., 25 vjeç, banues në Durrës, i cili ka ndërruar jetë.
