Uniformat blu kanë goditur një tjetër rast të trafikut të lëndëve narkotike, duke arrestuar në flagrancë tre shtetas. Po kështu, burimet zyrtare bëjnë me dije se kanë sekuestruar në cilësinë e provës materiale 23 kg lëndë narkotike cannabis sativa.
Nga shërbimet e Policisë Kufitare të P. K. K. Muriqan, në D. V. K. M Shkodër, u arrestua në flagrancë shtetasi Maliq Kruja, 54-vjeç, banues në Tiranë.
Arrestimi i tij u bë pasi është paraqitur në P. K. K. Muriqan në dalje të RSh, me mjetin e tij tip Benz me targë DC187ZA, ku nga kontrolli i ushtruar në vijën e dytë u gjetën dhe u sekuestruan 23 kilogramë lëndë e dyshuar cannabis sativa.
Gjithashtu në P. K. K. Muriqan u arrestuan shtetasit, E. M. 31-vjeç, banues në Durrës dhe A. B. 26-vjeç, banues në Tiranë, pasi gjatë kontrollit të ushtruar në autobuzin e linjës Shqipëri-Gjermani, në sediljen e këtyre shtetasve, u gjet dhe u sekuestrua një sasi e vogël lëndë narkotike e dyshuar cannabis sativa.
Materialet iu referuan Prokurorisë për Krimet e Rënda Tiranë, në ngarkim të shtetasit Maliq Kruja, për veprën penale “Trafikimi i narkotikëve”. Në ngarkim të shtetasve E. M. dhe A. B. u referuan materialet Prokurorisë së Rrethit Gjyqësor Shkodër, për veprën penale “Prodhimi dhe shitja e narkotikëve”.
