Operacioni Forca e Ligjit njoftoi ditën e sotme se i ka dërguar formularët për vetëdeklarimin e pasurisë dy të dënuarve të tjerë.
Bëhet fjalë për shtetasit Emiljan Shega dhe Klodjan Çopja, të dy të dënuar më parë në Angli për trafikim narkotikësh. Emiljan Shega është arrestuar rreth 10 vite më parë, si pjesë e një grupi kriminal që trafikoi drejt Mbretërisë së Bashkuar lëndë narkotike me vlerë 10 milion paund.
Shqiptarit iu gjet droga e fshehur nën parketin e dyshemesë, e mbuluar me qilima, mbi të cilët kishte vendosur edhe një divan. Ai u dënua me 10 vite burg. Ndërsa, Klodjan Çopja rezulton të jetë dënuar në Angli më 4 gusht të vitit 2017 me 17 vite burg, pasi akuzohet se drejtonte një rrjet të trafikut të kokainës.
Çopja akuzohej për importimin e një sasie kokaine me vlerë 60 milionë paund drejt Mbretërisë së Bashkuar. Ai u arrestua në Greqi në Mars të vitit 2017, për t’u ekstraduar drejt Mbretërisë së Bashkuar.
