Në seancën plenare që do të mbahet sot në Kuvend në orën 17:00, do të shqyrtohet kërkesa e PS për ngritjen e Komisionit Hetimor për shkarkimin e Ilir Metës.
Komisioni Hetimor që do të marrë në shqyrtim kërkesën e mazhorancës për shkarkimin e Metës, do të përbëhet nga nëntë anëtarë.
Pesë anëtarë të këtij komisioni do të jenë nga mazhoranca, ndërsa katër të tjerë nga opozita parlamentare.
Drejtuesi i Komisionit Hetimor do të jetë deputeti socialist, njëherësh kreu i Komisionit të Ligjeve, Ulsi Manja.
Anëtarët janë; Vasilika Hysi, Klotilda Ferhati, Bashkim Fino dhe Alket Hyseni nga PS. Akoma nuk dihen emrat e katër anëtarëve të opozitës parlamentare.
Më herët, përmes një urdhri, kryetari i Parlamentit, Gramoz Ruçi, ndryshoi agjendën e Kuvendit, duke spostuar me një orë seancën e ditës së sotme.
Ndryshe nga sa ishte parashikuar, seanca e sotme do të zhvillohet në orën 17:00, dhe pritet që brenda orës 19:30 të ketë përfunduar.
Partia Socialiste do të zhvillojë sot 120 minuta debat parlamentar në lidhje me një raport të Komisionit të Ligjeve, për shkarkimin e Presidentit Meta.
Pritet që shumica qeverisëse të votojë ngritjen e një Komisioni Hetimor, që do të marrë në shqyrtim 9 shkeljet kushtetuese të konstatuara nga Komisioni i Ligjeve, dhe më pas të finalizojë me votë shkarkimin e kreut të Shtetit.
